Jude

Tam gawa imi mu kari saki ikisan mu Jesus ko uria Jude batogam masan (Matthew 13:55 Mark 6:3). Nu den sang kelemak balukko. Bare den kawel ko kausa kariimet sang nuna nunumi balukasan Kris kariimet makasan ale Kris alo nunga ningi kasu naguman ale ura bitakasan. Se umutang ko, Jude nunga dugu duap balu se, Kris alo nunga maonam, “Den nunguning ana ko nangamang ningi nunguning aram mu ninguru ilukuawural, ale te kawel kari nunga den biriruwuralko,” mam (3-4, 20).

Jude

Den gira

1 Ani Jude, Jesus Kristus ko ura kari se James ko uria ani, bare den imi bataguru nina kariimet Kaem ninga auram ale ninga giam wore ningarsam. Nanga Nainet Kaem ninga kueso, se Jesus Kristus ninga sinar taso. 2 Kaem ninga kueruk ale ko gomang yawara, se ko lila ninguru tala ningaruk se te bagaralko.

Den kawel ko kausa kariimet sang Kris alo nunga ningi bagakasan

3 Aga singsang yawara, ani Kaem Jesus Kristus te nanga sangaru tam wore ko den sang tam gawa te bataguru ningarikko angamang biyala anikaso. Bare kawel kariimet sang ninga ningi utu naguman se ani aking den bo iwita ninga manikko ko ikiem: nina den nunguning ana ko nangamang ningi nunguning aram mu ninguru ilukuawural ale te kawel kariimet sang nunga den biriruwuralko. Mu awuk, Kaem den nunguning umutang ana ko kariimet bitarnakko nangaram, se den mu eng tom suen biya uwutata anirukko. 4 Bare kawel kariimet umutang am tetela la ninga ningi utu naguman ale ura betesan. Nuna Kaem ko me nguangasan, ale “Kaem gomang nangaram ale Kristus te nanga sangaru tam,” ma balu se, “anapeya kilek mu kaola bo mena am betenakko,” ma se, kilek memek duap duap betesan. ^{▼▼Jude 1:4 Nunga ikia kawel: 1 Cor 6:12; Rom 6:15-16.} Munan umutang te nuna nanga Biya suwanta Jesus Kristus, nanga King, mu nubiring tusan. Bare nuna kilek mu ko koma memek tamonko mu girakala Kaem ko batoga te balam se aniso.

5 Nina mel maingkala ko ikiman wore aking ani am balik se ikialko, mu iwita: Kari Biya Egypt ningi Israel alo nunga bataguru nunga giam ale arungu aratam, bare udagi te nunga ningi saki noko me nongomang ningi nunguning mu nunga menawuram. ^{▼▼Jude 1:5 Israel alo: 1 Cor 10:1-20.} 6 Se aking engel sang girakala nunga ura nup ago mu te yawarakala me bagaman ale nuguwim beteman mu, Kaem kuwim tiromorom biya mu ningi nunga talipa awuram, se Tutera Tom Biya mu ko kimi bita se bagasan. Nuna tom suen biya memek to se bagomonko. ^{▼▼Jude 1:6 Jude nu Genesis 6:1-4 se den saki agotala wore ko iki se balso agila.} 7 Se Sodom, se Gomorrah, se wonong pingi pingi, mu munan koma suwanta tala beteman ale saman katagot, se kilek memek memek dolara karogo mu te ninguru namakasan. Se Kaem koma memek nungaram mu tama biya te wonong mu nunga menawuram. Umutang tama tom suen biya kaniwoso mu ko kausa, se ana te ikinak ale munan nuna beteman mu me betenakko.

8 Butatala, kawel kariimet aitak anisan mu nongota nunga ipingira kawel mu nongomang atumuso se ikia memek memek karur ago mu nungumik guang te bita se anisan. Nuna supuling nuguring bowa ningi bagomonko mesan. Ale duruk wonong ko engel kualala anisan mu nunga balu maguwusan. 9 Girakala engel supuling biya Michael mu nu Satan ilak Moses ko kumik guang guramukasan ale ko den tagikasan. Bare Michael me supuling lagakaso se den memek bo Satan me manarukaso. Mena. Nu balam, “Kari Biya ni ining kisokko!” mam. 10 Bare kariimet imitang mu nuna mel ninguru me ko ikisan bare balu maguwusan. Ale aking mel nuna ko ikisan, mu buruk kausik ikia mena iwita am betesan, ale mel borta te nunumi maguwusan.

11 Nuna ikup biyala nunga irokkowo! Mu awuk, nuna Cain ko molak karoman. Ale aking nuna koma manga tamonko se, prophet ko nup Balaam, nu kawel se memek bitakaso uwutatala mu nuna ninguru te bitakasan. Ale aking Korah nu Kaem kuring batogam iwitatala, nuna Kaem kuring batagorman, ale Korah memek tam turantala memek tamonko.

12 Nuna nenenga na inang na ko biguwura betesan mu ningi nuna karur memek iwita bagasan. Ale dolara nguangara bo mena nengerak na yu nasan ale nongota la nunumi ko sinar tasan. Nuna taiti nuwi yam kaetmaso ale tuwik me kaposo se daula itugu parasuwu warso iwitata bagasan. Nuna tam ko tom te nunguning me kaposo se barukasan se marakoso wore turan. 13 Nuna gagi kelagoso ale marok kulukuling ago aratu saun kore te kulukurso iwitata, kilek memek dolara ago betesan. Ale nuna taiti kuali baras nuguwim betesan ale kuwim ngual ngual to to geragasan iwitata. Kaem nunga nuguwim tiromorom ago kaetam nunguningkiri tom suen biya te bagomonko mu nunguru beteram se aniso.

14 Enoch mu nu Adam ko gue te ko taleng girigir arataman tai tai, nunga tom 7 mu te nu aratam. ^{▼▼Jude 1:14 Enoch: Genesis 5:18, 21-24.} Ale nu prophet den balu se kariimet memek alo imitang udagi memek tamonko mu ko iwita balam:

“Arigalko!” mam,
“Kari Biya ko engel kako nunguningkiri mu kaura ko moke mena wore arungu taiwoso.
15 Nu ali lilim la nunga tuteruk ale
kariimet Kaem nubiring tuman ale memek duap duap bita se,
Kaem kumik ko den memek memek balu se animan,
mu mel mu suen la ko koma memek nungarukkowo!”
16 Kariimet imitang nuna kariimet saki nubiring ko den balmonko kariimet. Nuna tom suen biya nuguring ningi den ngual ngual balu se, nongota nunga ikia memek karo tui se bagasan. Nuna nongota nunumi patawomonko nuguring nirung kaposo. Se aking nongota nunumi te sangarmonko kariimet sang den welang te nunga manorsan.

17 Bare aga singsang yawara, nanga Biya Jesus Kristus ko apostle alo den balman mu ko ikialko. 18 Nuna iwita ninga manorman, “Tom nukum te kariimet sang aratomon ale Kaem ko den, se ko munan, ko gusia den balmon ale, nongota nunga ikia memek karo tumonko,” maman. Se umutang ko ninguru sinar talko! 19 Kariimet imitang Kris alo nunga pagorsan. Nuna ali imi ko ikia munan la karo tusan, se Korang Bur nongote mena.

Kris alo sokel ago baga se nunumi sangarmonko

20 Bare aga singsang yawara, nina mu den nunguning kako nina ko nengemang ningi nunguning aram mu te nengemang motam sokel tualko. Ale Korang Bur ko sokel te ngatanga se bagaralko. 21 Kaem ko gomang ninga kueso mu kar iwita ninga taluru gurugam. Buta se, nina ningi la baga se, nanga Biya Jesus Kristus gomang ningaruk ale marak sokel yawara tom suen biya te bagaralko mu ago tai ningarukko mu ko kimi bita se bagaralko.

22 Nina arikaya nongomang nama taiwoso mu nengemang nungaralko. 23 Saki tama ningi namomonko negawasan mu, tairatela nunga saongal ale nunga gial se aratomonko. Saki mu nunga kilek memek mu guang karur ago nunguningkiri wore turan. Se mu ko nina nguanga se, nunga kilek memek mu nibiring tui se, nengemang nungaral ale nunga saongalko.

Kaem nup biya tua ko den

24 Kaem nina dagulal bore ko ninga sinar tauk ale, ninga gi noko koma dugu te nikim biya mu te ninga awurok se, memek bo mena, amilmil ago la bagaralko mu nu terong mam. 25 Se ana noko nup biyala patowanakko! Nu nanga Biya Jesus Kristus te nanga sangaru tam. Nu Kaem nunguning kota suwanta, nu King Biya, nu mel suen biya ko supuling, nikim karogo, se sokel karogo, duap te nunguningkiri, se aitak, se tom suen biya udagi te. Nunguning!